التقنية اليوم صارت جزء من حياتنا المتسارعة، دايما في تطور وتجدد، و تأثير التقنية على حياتنا اليومية محد يختلف عليه، سهلت علينا إنجاز مهامنا العملية بشكل أسرع، ساعدتنا نتعامل بكل بساطة مع أشخاص من مختلف أنحاء العالم، كذلك دائرة الأعمال صارت ممتدة غير محتكرة على منطقة جغرافية وحدة. التقنية أتاحت لنا قنوات ضخمة للتعلم والمعرفة بمختلف المجالات، هذا غير أنها تعين على إدارة الوقت وتمكين الكثير من ممارسة أكثر من وظيفة ومصدر دخل بنفس الوقت. ⭐️
بعض الاشخاص يفهم أن التقنية شيء صعب ومستحيل لكن الحقيقة، هي مثل اي تخصص؛ مجال قابل للتعلم لو الغينا منها الخوف و الرهبة راح تجد أي شيء في حياتنا تدخل فيه التقنية.
كثير يبدأ في المجال ومعرفته بسيطة و سطحية جدا! لكن من اسهل الامور انك تتعلم ومن حقك تُخفق لان كل شي يجي مع الممارسة. التقنية زيها زي اي مهارة خلينا نقول مثل ركوب الخيل احتمالية انك تطيح من اول وثاني وثالث مرة موجودة، مع الوقت راح تحصل نفسك مُتمرس. اهم شي لا تتوقف عن التعلم ولا تحس بيوم أنك وصلت للحد الي تكتفي فيه من تطوير نفسك. اختار المغامرة والتحدي وساعتها بتكون خبير امام الناس وعندك ميزه تنقل علمك الي اكتسبته الى غيرك من المهتمين في المجال.👌🏼
مصطلح تقنية هو مصطلح له مظلة كبيرة يشمل كثير من الأمور. حتى اذا تخصصت في مجال معين لاتحرم نفسك تكون زي اي شخص مطلوب بشكل كبير في السوق، وهذا يعني مضاعفة فُرص رغبة السوق فيك بأنك تتسلح باستمرارية التعلم، وتصب طاقتك في تعلم آخر التطورات والمستجدات وما تكتفي بالمعرفة بتخصصك.
بالنسبة للطلاب والطالبات المترددين في اختيار أي تخصص تقني:
التخوف في البداية جدا طبيعي وواقعي وابدا لا تحط نفسك تحت ضغط، اذا حاب تتخصص سواء بالتقنية أو غيرها. كثير ناس خاضوا تجارب ما تتعلق في التقنية ولكن بعد مدة صارت التقنية هي محور حياتهم. و اذا اخترت مجال في غير التقنية شجع نفسك على الإطلاع والتعلم في أي مجال من مجالات التقنية اللي تقدر تربطها في تخصصك ومع الوقت تلقائيا راح تحصل نفسك ربطت التقنية في نفس تخصصك ومجالك العلمي، وهنا بيكون عندك ميزة اضافية عن غيرك. لان في التخصصات التقنية صحيح ان التخصص والشهادة مهم لكن الخبرة والممارسة مطلوبة ومهمة ايضا. 👏🏼
نقترح عليك تكتشف وتبحر في كل تخصص من تخصصات التقنية ساعة أو ساعتين من يومك، شاهد فيديوهات متفرقة عن تخصص معين في بالك، اذا ماحصلت شي جذب انتباهك او ما صار عندك فضول تعرف اكثر معناته هذا مو تخصصك واستمر بالبحث والمشاهدة، إلى أن توصل للمعلومات الي عقلك يتوقف عندها و يبدأ يثير الاسئلة للاستزادة و المعرفة. ساعتها من كمية المعلومات الي تعرضت لها خلال بحثك، راح تعرف الشيء المناسب لك.
أخيرا، لا تكتفي بالمعلومات اللي تحصل عليها إذا تخصصت في الجامعة، كن حريص على البحث والمعرفة الدورية. من أكثر النعم الي نحمد الله عليها وجودنا في منطقة خصبة مهتمة في مجال التقنية وتطويرها مثل المملكة العربية السعودية، واي شخص راح يتخصص في التقنية راح يخوض هذا الحراك لان البنية التحتية قوية وهيئة الاتصالات والفضاء والتقنية حريصة على بناء جيل متمكن وواعي بتأثير التقنية سواء على حياتنا أو مستقبلنا.🇸🇦🤍
.jpg)
